Türk Dövlətləri Təşkilatına (TDT) üzv ölkələr arasında standartlar, mənşə prosedurları və ticarətin asanlaşdırılması üzrə daha sıx uyğunlaşma əhəmiyyətlidir.
Bu barədə Prezident yanında Antiinhisar və İstehlak Bazarına Nəzarət Dövlət Agentliyin sədri Elnur Bağırov Bakıda keçirilən II Azərbaycan Beynəlxalq İnvestisiya Forumunda (2nd Azerbaijan International Investment Forum – AIIF 2026) bildirib.
Onun sözlərinə görə, bu, Azərbaycanda fəaliyyət göstərən istehsalçıya Orta Dəhlizi xəritədəki bir xətt kimi deyil, inteqrasiya olunmuş istehsal və ixrac bazarı kimi qəbul etməyə imkan verərdi: “Dəmir yolları, enerji infrastrukturu, logistika mərkəzləri və sənaye zonaları vahid istehsal şəbəkəsinə inteqrasiya olunur. Türk Dövlətləri Təşkilatı bu şəbəkəyə həm bazar miqyası, həm də institusional çərçivə verir. Təkcə üzv dövlətlərin iqtisadiyyatları deyil, həm də onlar arasındakı ticarət genişlənir. Gömrük sadələşdirilməsi, rəqəmsal nəqliyyat sənədləri, iqtisadi zonalar arasında əməkdaşlıq və Türk İnvestisiya Fondu üzrə irəliləyiş bu miqyası investisiya edilə bilən layihələrə çevirə bilər”.