“Tramp marşrutu” (TRIPP) çərçivəsində gələcək qaz kəməri Ermənistan üçün yeni qaz mənbəyinə çevrilə bilər.
Bu barədə hakim “Vətəndaş müqaviləsi” partiyasının deputatı Sarkis Xandanyan brifinqdə bildirib.
Onun sözlərinə görə, Rusiya qazının qiymətinə yenidən baxılması məsələsi ortaya çıxarsa, Ermənistan bunu rusiyalı tərəfdaşları ilə dostcasına müzakirə edəcək.
Lakin onun fikrincə, bu məsələdə şaxələndirmə vacibdir.
Xandanyan qeyd edib ki, Ermənistanın ərazi idarəetmə və infrastruktur nazirinin İrana son səfəri zamanı İslam Respublikasından qaz tədarükünün artırılması imkanı müzakirə olunub.
“TRIPP layihəsi qaz kəmərinə də aiddir, yəni onun çərçivəsində Ermənistan ərazisindən qaz kəməri çəkiləcək. Və bu, ehtimal ki, əlavə qaz mənbəyinə sahib olmaq üçün daha bir imkandır. Bu, nəzəriyyə olsa da, təcrübədə bunu həyata keçirmək çətin deyil”, – Xandanyan qeyd edib.