“Azərbaycan Sığortaçılar Assosiasiyası” (ASA) İctimai Birliyinin tərkibində sığorta agentləri və brokerləri üzrə iki yeni işçi qrupu yaradılıb.
Bunu qurumun İcraçı direktoru Abas Miskərli Assosiasiyada sığorta agentləri ilə keçirilən görüşdə bildirib.
Görüşdə sığorta vasitəçiliyi institutunu maraqlandıran məsələlər, sığorta agentlərinin üzləşdiyi problemlər, onların həlli yolları, eləcə də qanunvericilikdə sığorta vasitəçiləri ilə bağlı müddəalara təklif oluna biləcək əlavə və dəyişikliklər müzakirə edilib. A. Miskərli bildirib ki, sığorta vasitəçilərinin fəaliyyətinin daha da aktivləşdirilməsi, mövcud çətinliklərin operativ araşdırılması və aradan qaldırılmasının stimullaşdırılması məqsədilə ASA-nın nəzdində “Sığorta agenti” və “Sığorta brokeri” adlı iki işçi qrupu yaradılıb.
Hazırda ASA-nın tərkibində şirkət rəhbərlərinin təmsil olunduğu “Həyat sığortaçılığı” və “Qeyri-həyat sığortaçılığı” komitələri, həmçinin müxtəlif istiqamətlər üzrə fəaliyyət göstərən 20-yə yaxın işçi və ekspert qrupu mövcuddur.